एस.एस.जी.एम. कॉलेजमधील रयत सेवक परशराम चांडोळे यांचा सेवापूर्ती सत्कार समारंभ संपन्न
संपादक बिपीन गायकवाड महाराष्ट्र माझा न्यूज कोपरगाव
कोपरगाव येथील रयत शिक्षण संस्थेच्या, एस. एस. जी. एम. कॉलेजमधील शिपाई सेवक परशराम चांडोले हे नियत वयोमानाप्रमाणे व शासकीय नियमाने ३१ ऑगस्ट २०२५रोजी सेवानिवृत्त होत आहेत. परशराम चांडोले यांचा सेवापूर्ती सत्कार समारंभ नुकताच संपन्न झाला. सदर कार्यक्रमाचे अध्यक्षस्थान महाविद्यालयाचे प्राचार्य डॉ.माधव सरोदे यांनी भूषविले; तर प्रमुख अतिथी म्हणून एस.एस.जी.एम महाविद्यालयाचे माजी कार्यालयीन अधीक्षक वासुदेव भांबारे हे होते. महाविद्यालय सेवक कल्याण समितीच्या वतीने मान्यवरांच्या शुभहस्ते सत्कारमूर्तींचा सपत्नीक सत्कार करण्यात आला.याप्रसंगी मनोगत व्यक्त करताना प्रमुख अतिथी वासुदेव भांबारे म्हणाले की, या महाविद्यालयाच्या जडणघडणीत माझा खारीचा वाट आहे. आज या महाविद्यालयाने केलेली प्रगती पाहून मी भारावून गेलो आहे.कार्यक्रमाच्या अध्यक्षस्थानी महाविद्यालयाचे प्राचार्य डॉ.माधव सरोदे यांनी रयत कुटुंबातील सेवकांचा सन्मान करणे हे गरजेचे आहे. रयत सेवक सातत्याने काम करत असतो, त्याचा फायदा निश्चितच समाजाला, संस्थेला व कुटुंबाला होतो.त्यामुळे शासकीय नियमाने रयत सेवक निवृत्त होत असला तरी कर्मातून कधीही निवृत्त होत नाही. असे सांगून परशराम चांडोळे यांना पुढील आयुष्यासाठी शुभेच्छा दिल्या.
या मान्यवरांबरोबरच प्रा. प्रकाश सावंत, डॉ. देविदास रणधीर, संजय शिंदे, प्रवीण मोकळ, बाळासाहेब साळवे, चि.अथर्व चांडोळे, सौ. प्रज्ञा भोसले यांनी सत्कारमूर्तींच्या आठवणींना उजाळा दिला.सदर कार्यक्रमासाठी डॉ महाविद्यालयातील सर्व शाखांचे उपप्राचार्य, सौ.चांडोळे, आप्तेष्ट, मित्रपरिवार यांसह महाविद्यालयातील सर्व प्राध्यापक, कार्यालयीन अधीक्षक सुनील गोसावी,सर्व शिक्षक-शिक्षकेतर कर्मचारी उपस्थित होते. सदर कार्यक्रमाचे आयोजन महाविद्यालय सेवक कल्याण समितीचे चेअरमन,सदस्य व आयोजकांनी केले होते. सदर कार्यक्रमाचे प्रास्ताविक व पाहुण्यांचा परिचय ग्रंथपाल चंद्रशेखर खैरनार यांनी करून दिला. प्रा. डॉ. सीमा चव्हाणव प्रा.मयुरी देवकर यांनी सूत्रसंचालन केले. तर डॉ.अर्जुन भागवत यांनी आभार मानले.
