सोमवार पासून नगरपरिषद निवडणुकीसाठी उमेदवारी अर्ज दाखल करण्यास सुरवात
संपादक बिपीन गायकवाड महाराष्ट्र माझा न्यूज कोपरगाव
कोपरगाव नगरपरिषद निवडणुकीसाठी प्रशासनाने मतदान केंद्र व विविध पथक यासाठी ७५० कर्मचाऱ्यांची नियुक्ती केली असून आचारसंहिता भंगाच्या तक्रारीसाठी स्वतंत्र कक्ष निर्माण करण्यात आला आहे तसेच अर्ज दाखल करतांना केवळ ३ व्यक्तिंनाच प्रवेश दिला जाणार असल्याची माहिती श्रीमती भारती सागरे निवडणूक निर्णय अधिकारी व उपजिल्हाधिकारी,भूसंपादन क्र.७ अहिल्यानगर व महेश सावंत सहाय्यक निवडणूक अधिकारी व तहसीलदार कोपरगाव, तसेच सुहास जगताप मुख्याधिकारी व सहाय्यक निवडणूक अधिकारी यांनी दिली. २ डिसेंबर २०२५ रोजी कोपरगाव नगरपरिषदे साठी मतदान होत असून सोमवार दिनांक १० नोव्हेंबर पासून नामनिर्देशनपत्र दाखल करण्यास सुरवात होणार आहे.उमेदवारी अर्ज दाखल करण्यासाठी ११ प्रकारची कागदपत्रे अर्जास जोडावी लागणार आहे.त्यात शपथपत्र,मतदारयादीतील क्रमांकाची प्रत ,पासबुक छायाप्रत,अनामत रक्कम पावती,घोषणापत्र,अपत्या बाबतचे पार्श्वभूमी नसल्या बाबतची स्वयंघोषणापत्र गुन्हेगारी नोटरी,राखीव मतदारांसाठी जात वैधता प्रमाणपत्र,दैनिक खर्च व एकूण निवडणूक खर्च हमीपत्र,नगरपरिषदेकडील थकबाकी नसल्याचे प्रमाणपत्र विहित नमुन्यात जमा करावे लागणार आहे.त्याच प्रमाणे नाम निर्देशन पत्र दाखल करतांना प्रतिनिधी व सूचक यांनाच प्रवेश दिला जाणार असून मान्यताप्राप्त पक्षाच्या उमेदवाराला १ सूचक लागणार आहे.तर अमान्यता प्राप्त पक्षाच्या किंवा अपक्ष उमेदवाराला ५ सूचक लागणार आहेत.ज्या प्रभागातून अर्ज दाखल होणार आहे त्याच प्रभागातील सूचक राहणारा असावा तसेच सुचकाने एका पेक्षा अधिक उमेदवारी अर्जावर स्वाक्षरी केल्यास प्रथम प्राप्त उमेदवारी अर्ज स्वीकारण्यात येणार आहे.एका पेक्षा जास्त उमेदवारी अर्जावर वेगवेगळे सूचक लागणार आहेत. कोपरगाव शहरातील एकूण ६९ मतदान केंद्रांसाठी ५ क्षेत्रीय अधिकारी नेमण्यात आले असून नामनिर्देशन अर्जासोबत लागणाऱ्या प्रमाणपत्रे,कागदपत्रांच्या पडताळणीसाठी स्वतंत्र कक्ष स्थापन करण्यात आलेला आहे.अशी माहिती सहाय्यक निवडणूक अधिकारी(२),
मुख्याधिकारी सुहास जगताप यांनी दिली. त्याचप्रमाणे सोबत जोडलेल्या निवडणूक कार्यक्रमा प्रमाणे कोपरगाव नगर परिषदेची निवडणूक प्रक्रिया पार पडणार आहे. नामनिर्देशन पत्र १७ नोव्हेंबर २०२५ रोजी दुपारी ०३.०० वाजे पर्यंतच स्वीकारले जातील याची सर्वांनी नोंद घ्यावी.
