जिल्हा परिषद व पंचायत समित्यांच्या आरक्षण सोडतीचा कार्यक्रम १३ ऑक्टोबरला
संपादक बिपीन गायकवाड महाराष्ट्र माझा न्यूज कोपरगाव
जिल्हा परिषद निवडणूक विभाग व पंचायत समिती निर्वाचक गणांच्या आरक्षण सोडतीचा कार्यक्रम जाहीर करण्यात आला आहे. अहिल्यानगर जिल्ह्यातील सोडत कार्यक्रम सोमवार दि. १३ ऑक्टोबर २०२५ रोजी दुपारी १२.०० वाजता आयोजित करण्यात आला आहे.राज्य निवडणूक आयोगाच्या आदेशान्वये जिल्हा परिषद निवडणूक विभागासाठी नागरिकांचा मागास प्रवर्ग (महिला आरक्षणासह) व अनुसूचित जाती, अनुसूचित जमाती व सर्वसाधारण महिलांसाठी आरक्षण सोडत काढण्याची जबाबदारी जिल्हाधिकारी यांच्यावर सोपविण्यात आली आहे.
तसेच पंचायत समिती गणाकरिता कोपरगाव तालुक्याचे तहसीलदार हे प्राधिकृत अधिकारी असतील. तसेच पंचायत समितीतील सोडतीच्या कार्यवाहीवर देखरेख ठेवण्यासाठी उपजिल्हाधिकारी दर्जाच्या अधिकाऱ्यांची नेमणूक करण्यात आली आहे. तसेच राज्य निवडणूक आयोगाच्या मार्गदर्शक सूचनांनुसार कोपरगाव तालुक्यांमध्ये १३ ऑक्टोबर रोजी दुपारी १२.०० वाजता पंचायत समिती क्षेत्रांच्या आरक्षण सोडतीसाठी विशेष सभा आयोजित करण्यात आली आहे. त्याचप्रमाणे जिल्हा परिषदेच्या जागांसाठी मुख्य सोडत कार्यक्रम नेहरू सभागृह, जिल्हाधिकारी कार्यालय, अहिल्यानगर येथे दि. १३ ऑक्टोबर रोजी दुपारी १२.०० वाजता पार पडणार आहे. तसेच पंचायत समितीच्य निर्वाचक गणांच्या आरक्षण सोडतीचा कार्यक्रम कोपरगाव तहसिल कार्यालयातील (दुसरा मजल्यावरील सभागृहात आयोजित करण्यात आला
आहे तेव्हा तहसीलदार आणि उपविभागीय अधिकारी यांनी राज्य निवडणूक आयोगाच्या निर्देशानुसार आरक्षण सोडतीची कार्यवाही पार पाडून त्याचा अहवाल त्याच दिवशी जिल्हाधिकारी कार्यालयास सादर करणे अपेक्षित आहे.तसेच जिल्हा परिषद अथवा पंचायत समिती क्षेत्रातील सोडत कार्यक्रमास इच्छुक नागरिकांनी कोपरगाव तहसील कार्यालयातील दुसऱ्या मजल्यावर सभागृहामध्ये वेळेवर व वेळेत उपस्थित राहण्याचे आवाहन करण्यात आले आहे.
